كنت ناوى أفصص الألبوم ... بس بصراحة لقتني "عبيط" في الكلام عن الموسيقي ... علشان كدة هكتفي بوصف حالتي من بعد سماع الالبوم ... وكمان هحكيلكم شوية عن أحساسي قبل نزول الألبوم ولغاية ما السي دي بقي جوة حضني من أمبارح الساعة 10 من مساء ليلة أمبارح ... المهم أنا من أول اليوم أمبارح فاتح "لطيفة أون لاين" علشان أشوف إيه الظروف ... فضلت بحالة الترقب اللي سياتي فيها لغاية ما فتحت الموقع ... ولقيت الخبر نزل أنه الألبوم نزل مصر ... نزلت جري ... سألت عن الراجل "قرفته من 3 أيام في سؤالي عالالبوم" مع أني كنت عارف أنه هينزل السبت ... بس أنا كنت برخم وخلاص ... المهم أشتريت السي دي وكان المفروض أشغله على طول ... بس للأسف صاحب الشركة ومديري "كان موجود" يعني أخوكم مزنوووووق والسي دي معايا ومش عارف أسمعه ... أبص للسي دي بحسره وتألم "ومن جوايا بدعي ع الراجل علشان يخلع" المهم مطولش عليكم مشي الراجل ... وكنت أنا والسي دي لوحدنا ... فتحت السي دي روم ... ودخلت سي دي لطيفة ... وقلبي بدأ يدق بشدة ... بوم , بوم , بوم ... وال سي دي لا حس ولا خبر ...وبعدها المصيبة الكبيرة نزلت فوق دماغي زي القنبلة ... السي دي روم مش عاوز يفتح ويخرجلي الكنز بتاعي ... حاولت معاه كتير مفيش فايدة ... آآآآآآآآآآآآآآآآآآآآآآآة السي دي بتاعي كنزي مش عارف أطلعه زعلت أوي وكنت هعيط ... بس سبتني من الغضب وهديت خالص , وفتحت الكيسة , وبصيت جواها , وعرفت السبب ومن عرف السبب بطل "العجب" ركبت الوصلات كويس جداً .... وقلبي رجع ينبض بوم , بوم , بوم ... وأخيراً
الألبوم أشتغل
يالهوي ... لقيت سلطنة ... صوت هادي ... أغاني ترجعلك الهدوء اللي فقدناه ... سلطنة شرقية أصيلة ... آآآآآآآآآآه يا ست الكل , والله أجمل هدية لأفضل أتنين بنى آدمين بيحبوا بعض
13
غنوة من أجمل ال 13 غنوة إللي سمعتهم طول حياتي ... بس في غنوة حابب أتكلم عنها بالتفصيل لأنها بتموتني , الغنوة هي لو سهران
بجد والله تحفة ... فيها دويتو بين صوت لطيفة وعود نصير شمة والاتنين بيلعبوا في ملعب كبير أكبر من أستاد القاهرة نفسه وهو ملعب المبدع بهاء الدين محمد بصراحة الغنوة دي بحس أنه لطيفة فيها ملكة وجمبها عواد محترم وواقفين على مسرح وبيغنوا بصراحة ومش علشان أنا مجنون و مهووس و لاسع ب لطيفة بقول كدة لاء طبعاً أنا بتكلم كمحايد جداً وبقول لكل الناس لو سهران هي غنوة الصيف ده
ملحوظة
لطيفة أتبرعت بنص أجرها من الرنات بتاعت الألبوم لصالح بنك الطعام ... يعني للجماعة الحرامية اللي بينزلوا الالبوم من النت "حرااااااااااااااااااااام عليكم" مجهود فنانة عظيمة زي لطيفة يتسرق في لحظات ببلاش
كلمات الغنوة
لو سهران حبيبى على بالك هوايا
يبقى أنت الليلادى كدة سهران معايا
أنا زيك سهرانة حبيبى وبافكر فى هواك
والقمر اللى شايفه أنا شايفاه معاك
وحياة اللى بينا والقمر اللى بينا
أنا حاسة الليلادى حبيبى أن أحنا أتقابلنا
بتفكر فى حالى وبفكر فى حالك
والشوق اللى جالى أنا عارفة أنه جالك
لو حتى قمرنا ليلة لو ليلة هجرنا
على ضيه فى خيالنا هنكمل سهرنا
وحياة اللى بينا والقمر اللى بينا
أنا حاسة الليلادى حبيبى أن أحنا أتقابلنا
4 التعليقات:
اخي من يسمعك يقول عاشق ومعشوق
وحاضن وملوش محضون
دى كلماتي انا رامز عباس حبيبك
ولا بهاء ولا غيره
المهم اجمل ما في احساسك بالفن وعمقه انك
ادرتني من غير متاخد بالك كاصم يقرا ولا يسمع
المهم ل لطيفة يلزمها عريس اخوك موجود
اصلها حلوة وطيبه
بجد جميل انك كتب الاغنيه اقراها
هتابعك كتير
بس بجد انت انسان جامد
مش بجاملك بس شوف احساس اني اقرء اغنيه مش سامعها
لو سمحت سلفني السي دى احضنه
ولا هو مرتبط
سلام عليكم اخ حمادة
فن لطيفة را قي
و يرقى بنا الى اعلى الدرجات
حفظها و وفقها الله
و مبروك للجميع الالبوم الجديد
سلوى
احلى اغنية في الالبوم
إرسال تعليق